Chanel cosmetic bag

დღეს ასეთი საჩუქარი მივიღე :)

2 კვირა დილატო ფიტნეს კლუბში

ამ ორ კვირაში:
* თავს ვგრძნობ უფრო მსუბუქად;
* მეუბნებიან, რომ გავთხელდი;
* უკეთ გამომდის ვარჯიში და ნაკლებად ვიღლები;
მგონი, ორი კვირისთვის მშვენიერი შედეგია. მთავარია, ორი თვის შემდეგ ამ სიას წონა დაემატოს.ჯერჯერობით წონის მხრივ შედეგს ვერ ვხედავ, ერთი კილოს ფარგლებში ხან მეტი ვარ,ხან ნაკლები.

სამწუხაროდ, მხოლოდ 1–1,5 საათი ვვარჯიშობ. ვიწყებ მუცლის პრესით, ვაკეთებ, დაახლოებით 20 პრესს. შემდეგ განტელებით სხვადასხვა ვარჯიშებს. ამის მერე 25 წუთით რომელიმე ტრენაჟორი, 10 წუთი სირბილი, ისევ რომელიმე ტრენაჟორი იმავე დროით და ისევ სირბილი.სირბილი ძალიან მიჭირს. 2 წუთზე მეტს ვერ დავრბივარ, სიარულზე გადავდივარ 1 წუთით და მერე ისევ სირბილი.

საუნაშიც მიჭირს ზედა საფეხურზე 15 წუთი გაჩერება. ამასწინათ ძალიან მოვინდომე და რომ გამოვედი, თავი ცუდად ვიგრძენი, საერთოდ რეკომენდებულია თითოეულ საფეხურზე 5–5 წუთით გაჩერდება. საუნას რაც შეეხება, ჩემი რჩევით, შესვლამდე მოიხსენით ლითონის რამე თუ გიკეთიათ, ჯვარმა ძალიან დამწვა გული. აუცილებელია იხმაროთ თავსაფარი,რადგან საუნა თმაზე ცუდად მოქმედებს და თმის ცვენას იწვევს. საუნის შემდეგ კარგია კრემების გამოყენება.მე პირადად ამ ლოსიონს ვიყენებ

ფიტნესის პირველი დღის შთაბეჭდილებები

ჩემს თავს მშვენიერი სარვამარტო საჩუქარი გავუკეთე – დილატო ფიტნეს კლუბის აბონემენტი ვუყიდე და ვარჯიშიც დავიწყე,თან გმირულად დილის 8–11 საათებში ჩავეწერე,რადგან რეალურად ლექციებისა და მუშაობის მერე ვარჯიშის ენერგია აღარ მექნებოდა.
მართალია,დღეს კლუბში ჩემს საქციელს თამაში უფრო ერქვა ვიდრე ვარჯიში,მაგრამ პირველად მისულის სტატუსი მინდობდა და ტრენერმაც გამაფრთხილა,დღეს და შემდეგზე არ გტვირთავ, მერე აღარ დაგზოგავო..თუმცა უნდა ვაღიარო,რომ ეს "თამაშიც" საკმაოდ დამტვირთველი აღმოჩდა,რადგან ჩემი სხეული ასე მოძრაობას მიჩვეული არაა. საერთოდ,დასაწყისში დატვირთვა საშინელ ტკივილებს იწვევს თურმე, დღეს გამოცდილი გოგოები მიზიარებდნენ.
შემდეგ მისვლაზე საუნასაც დავიწყებ და ვარჯიშს მოვუმატებ.
რაც მთავარია, ძალიან მომწონს დილატო კლუბი, სასიამოვნო გარემოა და ვარჯიშის გაგრძელების მოტივაციას მიჩენს.

თმის მოვლა

თმის სიჯანსაღეს ამ დრომდე ყველაზე ნაკლებ ყურადღებას ვუთმობდი. თითქმის ყოველ დღე თმაზე მიდებულ ფენს და ხშირად გამოყენებულ თმის უთოს დიდ "ცოდვად" არ მივიჩნევდი და არც თმის მკვებავებით ვანებივრებდი თავს (პირდაპირი მნიშვნელობით :) ამ ყველაფერმა შედეგი გამოიღო და, როგორც ჩემი და ამბობს,თმის ბოლოები "გამეპუწა".

ასეთ დროს პირველი დახმარება გაფუჭებული თმის მოცილებაა და მეც ასე მოვიქეცი,შემდეგ თმის მკვებავის ხმარება დავიწყე.
ჩემს თმას Londa Professional Visible Repair შეურჩიეს,ადვილი მოსახმარია, ყველანაირი დამატებების გარეშე მხოლოდ შამპუნით დაბანის მერე ვისვამ. თავიდან ინტენსიურად, ყველა დაბანაზე გამოვიყენებ,2 კვირაში უკვე კვირაში ერთხელ გამოყენებაც საკმარისია. თანაც კარგია იმითაც,რომ თუ ბევრის წასმა მოგივიდა,თმა დაუბანელს არ ჰგავს, სხვა მკვებავებისგან განსხვავებით.
ჯერ მხოლოდ ორჯერ ვიხმარე, მგონი თმას ბზინვარება დაეტყო.ამის პარალელურად ფენი და უთო მივატოვე და ველოდები თმის საბოლოო გაჯანსაღებას :)

სასიამოვნო სიახლეები და ერთი წელი Hairhaus-ში

რა არის იმაზე სასიამოვნო, როცა სალონში ჩვეულებრივ მიდიხარ და ულამაზესი მძივებით, თმისამაგრებით, ბეჭდებით, საყურეებით სავსე კალათს გახვედრებენ, გეუბნებიან, რომ ამოირჩიო რომელი მოგწონს. ნივთს საჩუქრად იმის გამო იღებ, რომ უკვე რამდენჯერმე ეწვიე. ასეთ სასიამოვნო სიახლეს სალონი "Hairhaus" გვთავაზობს. არადა, ისე სწრაფად გადის ეს ვიზიტები, ისე სწრაფად ვავსებ მათ დაგროვებით ბარათებს, ვერც კი ვიგებ.

"Hairhaus" ცოტა ხნის წინ ამ სალონთან ურთიერთობის ერთი წელი შემისრულდა. აქ ვიკეთებ ყველაფერს, თუმცა ყველაზე აქტიურად მაინც ფრჩხილებს. დაახლოებით 10 დღეში მჭირდება გაკეთება, თუმცა ლაქი, ფრჩხილებზე მზურველმა ქალმა 3-4 დღეში უნდა მოიცილოს, მაგრამ უნდა გავამხილო, რომ ისე ხარისხიანად აკეთებენ მანიკურს, უმეტესად ახალ გაკეთებამდე მაქვს ხოლმე დატოვებული, რადგან საერთოდ არ ფუჭდება, თუ არ მოვინდომე და სულ წყალში არ მქონდა ხელი :)

თანაც ლაქის ქვეშ დამცავს უსვამენ, აქვთ ხარისხიანი და განსაკუთრებით ხარისხიანი ლაქები,ხატავენ ულამაზესად, რაც მთავარია, ნახატის გაკეთება მანიკურს ფასს არ მატებს. შენ თვალწინ ასტერილებენ და იარაღები აბსოლუტურად უსაფრთხოა, რისთვის ვიყიდე ჩემი იარაღები არ ვიცი, ტყუილად მიდევს სახლში, მაინც სალონის იარაღებით ვსრაგებლობ. ჰოდა, მეტი რა უნდა უნდოდეს მანიკურის მოყვარე ქალს :) მეც დავდივარ და ვიკეთებ :)

ჩემთვის მანიკურის გაკეთება უდიდესი სიამოვნებაა, რომელიც ულამაზეს შედეგს ტოვებს და ქალს ქალურობას და თავდაჯერებულობას მატებს. მიჩენს თავის მოვლის სურვილს და მახალისებს.
ერთი წლის განმავლობაში ჩემი ფრჩხილები იმდენად ლამაზი და განსხვავებული იყო, ფოტოებს ვუღებდი და ახლა სიამოვნებით ვიხსენებ ყველას :) რამდენიმე ნახატიანს თქვენც განახებთ. ფრჩხილებისთვის სურათის გადაღება რთული საქმეა, ამიტომ მთლად ხარისხიანი არ გამოდის ხოლმე, მთავარია დაახლოებით ჩანს როგორია...
დღევანდელით დავიწყებ.










შეაფასეთ და გამოთქვით აზრი:)

პილინგი - step 3 პილინგი გლიკოლის მჟავით

დღეს მესამე და ამ ეტაპზე ბოლო პილინგი გავიკეთე. პროცედურა იგივე იყო, რაც წინაზე, ამიტომ აღარ აღვწერ, უბრალოდ დღეს მჟავა უფრო დიდხანს, 10 წუთს გავიჩერე. მჟავის მოცილების დროს გამეხილა თვალები და საშინლად დამეწვა თვალები, დავპანიკდი, მეგონა მხედველობა დავკარგე, ისე მეწვოდა :) მაგრამ როგორც იქნა, გავიმშრალე და გამიარა ცოტა ხანში. თქვენც თუ ასე დაგემართათ, არ ინერვიულოთ, საშიში არ არის.
წინა პროცედურის შემდეგ წვრილი გამონაყარი და ნიკაპის გარშემო და ტუჩებზე ცოტათი დამწვარი კანი რამდენიმე დღეს დამრჩა, გუშინ და დილას უკვე სულ გადაწმენდილი კანი მქონდა. სავარაუდოდ, რამდენიმე დღე ახლაც დამჩება სახეზე პრობლემები, მაგრამ უკვე აღარ მეშინია :)
დღეს ჩემმა კოსმეტოლოგმა გამიკეთა არაჩვეულებრივი მასაჟი ზურგზე, გულ-მკერდსა და სახეზე. ძალიან სასიამოვნო პროცედურა იყო. ყველა მისვლაზე კიდევ უფრო მიყვარდება ეს ქალი :))))

პილინგი - step 2 პილინგი გლიკოლის მჟავით

ერთი კვირის წინ სახის გაწმენდის შემდეგ პირდაპირ გლიკოლის 70%-იანი მჟავით გამიკეთა პილინგი დღეს კოსმეტოლოგმა. დამბანა, შემდეგ მჟავა წამისვა, 7 წუთს გავიჩერე, თავიდან ოდნავ მეწვოდა, ბოლოს უკვე -ძალიან, თუმცა მაინც ასატანი იყო.მერე დამაწყნარებელი კრემი წამისვა 20 წუთით,თვალის არეებზე და ტუჩებზე კიდევ სპეციალურად სხვა კრემები. ამის შემდეგ კიდევ ერთი დამამშვიდებელი კრემი წამისვა, ბოლოს დარცენვალი, დამატენიანებელი და ტონალური. ერთი რჩევა მომცა,რამეს რომ წაისვამ სახეზე, ხელით ცოტა "ურტყი", სისხლის მიმოქცევას აჩქარებს და ფორებში უკეთესად ჩადისო.
წინა პროცედურის სიწითლე მეორე დღეს უკვე აღარ მქონდა. იმედია, ხვალაც ეს პატარა რაღაცები რაც ახლა მეტყობა, გამიქრება. შემდეგი პროცედურა კიდევ 70%-იანი გლიკოლი იქნება. სჯობს ერთ კვირიანი ინტერვალებით გავიკეთო,ასე უფრო ნაკლები პროცედურა დამჭირდება. თითოეული პროცედურის ფასი 80 ლარია.

პილინგი - step 1 კანის გაწმენდა

პილინგების გაკეთება დავიწყე. სავარაუდოდ, 3-4-ჯერ მომიწევს მისვლა კოსმეტოლოგთან. დღეს მხოლოდ გავიწმინდე სახე კრისტალური წმენდის მეთოდით. პროცედურები დაახლოებით 1 საათი გაგრძელდა. თავიდან კარგად გამისუფთავა კანი პურანის (by Biodroga)სახის დასაბანით, შემდეგ წამისვა კრისტალური წმენდის კრემი და ჩამირთო ორთქლი. 15 წუთის მერე კოვზით გამისუფთავა სახე. ამის შემდეგ 15 წუთით კანის დასამშვიდებელი კრემი წამისვა. ბოლოს დარცენვალის მსგავსი პროცედურა გამიკეთა.წარბებიც ამომიღო ზედმეტი რაც მქონდა. ეს ყველაფერი იყო სასიამოვნო მუსიკისა და სახის მასაჟის ფონზე. ძალიან სასიამოვნო პროცედურა იყო.
სახის გაწმენდისა და პილინგის დროს კანის სახლში მოვლას აქვს დიდი მნიშვნელობა. ამისათვის მაქვს პურანის დასაბანი და მედიქ სქინის (by Biodroga)-ის დამატენიანებელი კრემი, რომელსაც კანის აღმდგენი ფუნქცია აქვს, განკუთვნილია მგრძნობიარე კანისთვის და ეფექტურია პილინგების, ეპილაციის და სხვა ესთეტიკური ჩარევების დროს.
ჩემი კოსმეტოლოგი მირჩევს, რომ სახის გასუფთავების შემდეგ, ყოველდღიურად ვიხმარო ტონალური კრემი. მოვერიდო მზეს, მტევრს.
შემდეგ კვირას უკვე გავიკეთებ 30 პროცენტიან პილინგს, შემდეგ - 50 და 70 პროცენტიანებს.

P.S. ერთი სასიამოვნო ინფორმაცია გავიგე დღეს: ვაკის აუზს საახალწლოდ აქვს აქცია - შეგიძლიათ შეიძინოთ აბონიმენტი 240 ლარად (არ შედის შაბათ-კვირა და საღამოს საათები 6 საათის მერე, ნებისმიერ დროს რომ შეძლოთ შესვლა 360 თუ 370 ლარი ღირს). ძალიან მინდა, 1 თვით მაინც ვიარო და იქნებ სანტა კლაუსმა მაინც მაჩუქოს აბონიმენტი :)

ხინკლის დიეტამ გაამართლა :))))

ერთკვირიანი დიეტის შედეგი მშვენიერია, თითქმის 3 კილო დავიკელი, არადა, ერთხელ ტორტი ვჭამე, 2-ჯერ ხინკალი :)) სამაგიეროდ, დავდივარ ფეხით ბევრს, არ ვჭამ პურს და ვცდილობ 7 საათის მერე ან არ ვჭამო, ან ძალიან მსუბუქად ვჭამო. სიამოვნებით ვაგრძელებ და იმედია, მომავალ კვირამდე 2 კილოს მაინც დავიკლებ.

დიეტა (ჩემებური)

დღეს დიეტის მეორე დღე მქონდა და ანგარიში მინდა ჩაგაბაროთ რა და როგორ ვქენი :) დილას 2 მოხარშული კვერცხი, 1 კიტრი, 1 ნაჭერი ყველი, შუადღისას ცოტა ბულიონი, საღამოს ბეილისი (50 გრ), ხილის სალათი (ანანასი, კივი, ბანანი, ფორთოხალი) და მილქშეიკი. მგონი, ცოტა მეტი მომივიდა,განსაკუთრებით საღამოს, ვეცდები ნელ-ნელა შევამცირო.
კიდევ შეგახსენებთ, რომ „ჰეარჰაუსში“ კომბოს აქცია მიმდინარეობს და არ დაგავიწყდეთ შეიაროთ. კომბო გულისხმობს სამ პროცედურის შემთხვევაში, ჯამში 5 ლარის მოკლებას. მე დღეს ერთი საათი ელექტრო ეპილაციაში, მანიკურსა და დავარცხნაში 35 ლარი გადავიხადე. თმაზე ახალი თანამშრომელი ჰყავთ, დღეს მან დამვარცხნა და ძალიან მომეწონა. უაზროდ ვარ ამ სალონზე შეყვარებული...

პირველი პომადა და სასაჩუქრე ბარათი

გუშინ პირველად მაჩუქეს ისი-პარის 100-ლარიანი სასაჩუქრე ბარათი და დღეს დილითვე წავედი მაღაზიაში. კონკრეტულად არ მქონდა გადაწყვეტილი რისი ყიდვა მინდოდა, დაახლოებით კი ვფიქრობდი, რომ კოსმეტიკა იქნებოდა, რადგან სუნამოები მაქვს რამდენიმე და მაინც არც ერთს არ ვხმარობ ხშირად. ბოლო დროს მომინდა, რომ მქონდეს პომადა, აქამდე არასოდეს მიხმარია, მარტო ბლესკები მქონდა და მასაც იშვიათად ვისვამდი. პომადა დიდი გოგოების საგანი მეგონა, ეტყობა დიდი გოგო გავხდი :) ვიყიდე 1 სრულფასოვანი პომადა და ორი მოპომადო ელემეტი, უფრო ბალზამებია, ერთის დიზაინი მომეწონა და ერთის - სუნი :) სამივე ვარდისფერი, კიდევ სახის დასაბანი და ჩემი დისთვის ტონალური კრემი. სამწუხაროდ, ფასდაკლება დასრულებული დამხვდა და ფულის დამატება მომიწია, მაგრამ არაუშავს, უფრო დიდი ნაწილი მაინც უფასოდ წამოვიღე.
კარგი რამეა უფასოდ რომ არჩევ, კიდევ არ ვიტყოდი უარს :)
არ ვიცი მეჩვენება თუ მართლა საგრძნობლად გაზრდილია ისი-პარიში ფასები, დაახლოებით მახსოვს რაში რამდენი მაქვს გადახდილი წინა წლებში და წელს იგივე პროდუქტებს ბევრად დიდი ფასები ედო.
ხო, კიდევ, გათამაშების ბილეთები გუშინ გამიხდა 12 ცალი და პეჟოს მოგება წელსაც მინდა :)

Hairhaus 2

ფრჩხილების გაკეთება დავიწყე ადამიანურად, მომილოცეთ! სურათზე კარგად არ ჩანს, მე ძალიან კმაყოფილი ვარ. Hairhaus-ში გავიკეთე. გაკეთებამდე ერთკვირიანი მოსამზადებელი პერიოდი გავიარე, ჯერ იარაღები ვიყიდე, მერე ფრჩხილები ცოტა გავიზარდე, ცუდად მქონდა დაჭრილი. ეკამ კიდევ იყოჩაღა და რაღაც ფორმა მისცა. ნელ-ნელა დავხვეწავო, დამანუგეშა... ერთ კვირაში უნდა მივიდე და ველოდები როდის გავა ეს დრო... თვითონ გაკეთების პროცესი იყო ძალიან სასიამოვნო. ეკამ ისე გამიკეთა, სისხლი საერთოდ არ წამომსვლია და არც მტკენია. ჯამში, სადაც ხელს ვყოფთ, საყვარელი პატარა ბურთულები ეყარა, ერთი განსაკუთრებით მომეწონა და ეკა სახლში მატანდა, აქ იყოს და ჩემი იყოს-მეთქი, დავტოვე :))) თითქმის ერთი საათი ვიჯექი, რადგან პირველად ვიკეთებდი და თან რამდენჯერმე ტელეფონზე დამირეკეს და შევაწყვეტინე, მოკლედ, ისე გავიდა დრო, ვერც ვიგრძენი.

ძალიან სასიამოვნო გარემოა თვითონ სალონში, სისუფთავე, რაც მთავარია. ჯამში, სადაც ხელს ვყოფთ ფრჩხილების გაკეთებისას, პარკი იყო ჩაფენილი და წყალი ისე ესხა. ერთი-ორჯერ სხვაგან, მეტ-ნაკლებად პრესტიჟულ სალონში გავიკეთე და იქ პირდაპირ ჯამში ჩამაყოფინეს თითები. მოკლედ, თუ ვინმე ხართ დარჩენილი, ვინც ჯერ არ ყოფილხართ Hairhaus-ში, აუცილებლად ეწვიეთ, არ ინანებთ!

GIGI MEDICAL

გუშინ კანის ექიმმა GIGI MEDICAL Derma clear დამინიშნა. პირველად გავიგე ამ ბრენდის შესახებ და გადავწყვიტე თქვენც გიამბოთ. საკმაოდ დიდი ფასი აქვს და თბილისში მხოლოდ ორ ადგილას იყიდება (აღმაშენებლის და კარგარეთელის ქუჩაზე). პროდუქტი გათვლილია ცხიმიანი და პრობლემური კანისთვის.
ძალიან სასიამოვნო სუნი აქვს... ისრაელში მზადდება 1957 წლიდან. კრემების ანოტაცია არაჩვეულებრივ შედეგს მპირდება, ათი დღით მაქვს დანიშნული და ვნახოთ რა იქნება :)

Hairhaus

ხუთშაბათს hairhaus-ში პირველად ვიყავი და ჩემი შთაბეჭდილებები მინდა გაგიზიაროთ. საერთო ჯამში, კმაყოფილი დავრჩი, ქეთი მაქსიმალურად ცდილობდა, რომ ყურადღება არ მოეკლო და თავი კარგად მეგრძნო.მეგონა უკვე დიდი ხანია ამ სალონში დავდივარ და ყველას კარგად ვიცნობ. თუმცა, უფრო კონკრეტულად ჩამოვწერ რა მომეწონა და რა არა...

მომეწონა:
1.ნანა, რომელმაც თმა შემაჭრა ზედმეტი ინიციატივების გარეშე, მშვენივრად, საქმიანად, სასიამოვნოდ... მადლობა ნანას :);
2. ყურადღება თითოეული კლიენტისადმი;
3. სისუფთავე;
3. სხვა სალონებისგან განსხვავებით, არ გამიგონია ვინმე რომ გაეჭორათ და არც სიგარეტის სუნი ტრიალებდა.
4. დაბალი ფასები;
5. ყოველი მე-7 უფასო ვიზიტი;
6. მდებარეობა (სახლიდან 2 წუთში მივედი);

არ მომეწონა:
1.თითქმის 15 წუთი მომიწია ლოდინი (ამ დროში მოვასწრებდი ტონალურის წასმას ან საინფორმაციოსთვის მუსიკის შერჩევას...). ლოდინს ყველაზე მეტად ვერ ვიტან, იმიტომ, კი არა, რომ უსაზღვროდ დაკავებული ვარ, უბრალოდ თავს უპატივისცემულოდ ვგრძნობ, მერე რაც არ უნდა გემრიელი ყავა მომიტანონ... ალბათ, ეს იშვიათად ხდება, ორშაბათს კიდევ რომ მივალ, ვნახავ :)
2. ზედმეტი ინიციტივები და შემოთავაზებები. როცა ვამბობ, რომ მყავს კანის ექიმი და კოსმეტოლოგი, რომლითაც ძალიან კმაყოფილი ვარ, უაზროდ მიმაჩნია თავიანთი კოსმეტოლოგების შემოთავაზება. ამის გამო ძალიან ბევრი სალონი მივატოვე. როცა მხედავდნენ, რომ პრობლემური კანი მქონდა, იწყებდნენ ჩვენ ასე-ისე გაგისუფთავებთ სახესო. ეს ყველაზე ძალიან მაღიზიანებს!
3.არ არის საჭირო ხშირ-ხშირად შემახსენონ: აი, რა კომფორტული გარემო გვაქვს, ჩვენთან ხომ კარგია და მსგავსი შინაარსის ფრაზები, ვიტყვი, არ მომერიდება :)
4.არასაქმიანი გარემო (ეს შეიძლება ახალი წლის გამო იყო)

ინტერნეტში რაც ამ სალონზე წავიკითხე, მარტო სალონის ქება მესმის. მე PR ტექნოლოგიები არ ვიცი, მაგრამ დარწმუნებული ვარ, როცა რამეს რეკლამას უკეთებ, მის ნაკლზე ცოტა მაინც უნდა ისაუბრო, თორე ზედმეტი მოლოდინი ხშირად იწვევს იმედგაცრუებას.
ამიტომ მოკლედ გეტყვით, რომ მშვენიერი სალონია, მით უმეტეს, თუ საბურთალოები ხართ და ჩემსავით თმას ხან სად იკეთებთ, ხან სად. ორშაბათს კიდევ მივდივარ და იმედი მაქვს, ამჯერად ნაკლებად სასიამოვნო შეგრძნებები გამიქრება :)

p.s. ფოტოზე ნანაა :)

დამატება:
3-ჯერ კიდევ მივედი და არანაირი ლოდინი, არც რამე შემოთავაზებები, ძალიან თავაზიანად და სასიამოვნოდ მემსახურებოდნენ, მეც შემიყვარდა ეს სალონი და გადაწყვიტე თმაზე და ფრჩხილებზე აქ ვიარო, სახეს რაც შეეხება, ძველ კოსმეტოლოგს ვერ ვთმობ, ჯერჯერობით მაინც :)